الأسماك اللافكية

 

    السلام عليكم و رحمة الله و بركاته في الواقع أغلبنا ان مكنش كلنا متفقين على ان الاسماك المعروفة بالنسبة

 لأغلبنا بتحتوي على فك زي الكائنات الحية التانية , ولكن البعض مننا ممكن ميكنش عنده معرفة بإن في بعض

 الاسماك اللي بالفعل مالهاش أي فك ولا فك علوي ولا حتى فك سفلي وطبعا بمجرد ماتسمع عن حاجة زي كده فده

 هيحسسك بنوع من الاندهاش , بس خليك على يقين ان أغلب موضوعاتنا هنا على القناة بالفعل هتكون مدهشة

 بالنسبالك فانت لازم تتعود على كده من دلوقتي بقى , أهلا بيك معاك محمود ولاء وانت بتتفرج على حلقة جديدة

 من حلقات قناة ثقافة ذهن .

الأسماك اللافكية            

    الأسماك اللافكية هي عبارة عن مجموعة من الأسماك اللي معندهاش أي فك سواء علوي أو حتى سفلي ,

 وفي الواقع النوع ده من الأسماك هو بيعتبر الأكثر بدائية بين الفقاريات الحية , ده غير ان أغلب الأنواع من

 الأسماك دي انقرض بالفعل , وفي وقتنا الحالي مافيش غير نوعين بس منهم هم اللي موجودين , و طبعا سمك

 بالمواصفات دي معندوش أي فك من الطبيعي و المنطق انه يبقى متميز بحاجة تفتقدها باقي أنواع الأسماك وده

 لإنه بيمتلك أفواه دائرية مفككة , كمان النوع ده من الأسماك معندوش أي زوائد زي باقي الفقاريات , بس

 بيمتلك ديل  و زعنفة ذيلية , و كمان الهيكل الداخلي ليه مش بيتكون من العضم عشان كده انا ماقلتش الهيكل

 العظمي وانما انا قلت الهيكل الداخلي وده لإنه في الواقع الهيكل بتاعه بيتكون من غضاريف , ولو جينا للجسم

 بتاعه فالجسم الخاص بيه متغطي بالجلد عادي جدا زي الفقاريات التانية , أما بالنسبة لأماعاؤها فهي طويلة

 حبتين فطولها تقريبا زي طول السمكة و ده طبعا لغياب المعدة , ولو عايز تعرف اشهر الامثلة اللي موجودة

 حاليا و فيها المواصفات دي فحب اقولك انه سمك ثعبان البحر واللي لو عايز تعرف عنه اكتر فتابع الحلقات

 الجاية لإن في حلقة انا مخصصهاله بالفعل ان شاء الله .

خصائص الأسماك اللافكية

    البشرة الخاصة بالأسماك اللافكية هي عبارة عن بشرة رخوة خالية من القشور , أما بالنسبة لشكل السمكة

 فبيكون شكلها شبه اسطواني و عيونها بتبقى متغطية بالجلد , أما بالنسبة لفتحة الأنف بتاعتها فهي بتحتوي

 على فتحة أنف واحدة موجودة في الطرف الأمامي منها , و عندها زعنفة ذيلية صغيرة حولين ديلها . أما

 بالنسبة للخياشيم بتاعها فدي في منها نوعين ,في نوع بيفتح عن طريق مسام منفصلة عن بعضها , والنوع

التاني  فده فيه انبوبة مشتركة واللي بدورها بتفتح على السطح من خلال ثقب واحد بس . و اللي تم التوصل ايه

 ان كل انواع الاسماك اللافكية المعروفة واللي عددها وصل ل 70 نوع بتبقى مقيدة بإنها تعيش قيعن البحار

 الباردة على أعماق بتتراوح مابين 10 متر لحد 1300 متر , أما بالنسبة لطول الأسماك البالغة فبيتراوح مابين

 40 سم لحد 80 سم , واللي تم التوصل ليه برضو هو ان كل الانواع متشابهة في الشكل الخارجي بتاعها ,

والاختلاف بس بيبقى في عدد الفتحات بتاعة الخياشيم و أماكنها . 

أنواع الأسماك اللافكية 

تم تقسيم الأسماك اللافكية لنوعين أساسيين من الأسماك اللافكية واللي هما :

الجلكيات

    الجلكيات دي أنواع طفيلية ليها أفواه ماصة قمعية الشكل بتستخدمها في انها تلزق في الفريسة بتاعتها ,

 كمان افواها و السنتها بتكون محتوية على العديد من الاسنان ودي طبعا بتستخدمها في فرك لحم فريستها . لو

 جينا نشوف الجليكات دي بتبقى عايشة فين هنلاقي ان الجليكات البالغة بتكون عايشة في بيئة البحار المالحة ,

 لكن في الوقت اللي هي خلاص هتتكاثر فيه بتتجه في الحال للأنهار العذبة , والمدهش في الموضوع ان

 الجليكات بتتكاثر في حياتها مرة واحدة بس , ومن المنطق انها تنتج عدد كبير جدا من اليرقات الصغيرة دي وده

 لكونها مش بتتكاثر غير مرة واحدة بس , طبعا الجليكات في بداية حيلتها بتمر بمرحلة اليرقات الغير ناضجة و

 بعد كده بتكبر وتوصل لمرحلة البلوغ , وبما إن التكاثر تم في المياه العذبة فمن المنطق ان اليرقات تتواجد في

 المياه العذبة و بالفعل اليرقات بتكون موجودة في المياه العذبة , و في المرحلة اللي بتوصل فيها لمرحلة البلوغ

 بتتجه تلقائيا ناحية المياه الملحة , و خليني أقولك ان اليرقات دي ليها أهمية كبيرة جدا بالتحديد لعلماء الأحياء

 اللي بيدرسوا تطور الفقاريات .   

سمك الهاج

    أما بالنسبة للمجموعة التانية من الأسماك اللافكية فهي أسماك الهاج , ودي عبارة عن أسماك بتتغذى على

 الكائنات الميتة و الكائنات المصابة و المجروحة في المية , و المعروف  عن سمك الهاج هو آلية الدفاع فالسمك

 ده بيستخدم طريقة دفاع غريبة حبتين وده لإنه بيخرج كمية كبيرة جدا من الوحل الفاسد في حالة التعرض لأي

 تهديد .

تاريخ الأسماك اللافكية 

    بتشير الأدلة اللي موجودة في السجل الحفري إلى ان الاسماك اللافكية وصلت لذروتها في التنوع قبل حوالي

 من 300 إلى 500 مليون سنة  وفي خلال الفترة دي الأسماك اللافكية كانت موجودة بشكل كبير جدا , واللي

 في الوقت ده أنواعها وصلت لأكتر من 200 نوع , بس أغلب الانواع كان صغير الحجم فكان طولها تقريبا

 بيوصل لبضعة سنتيمترات , أما بالنسبة للشوية اللي موجودين في الوقت الحالي فدول بقايا مجموعة واحدة من

 الأسماك اللافكية . 

    وبكده نبقى وصلنا لنهاية حلقتنا النهاردة ماتنساش تحط لايك و تشترك في القناة و تفعل زر الجرس عشان

 يوصلك كل مفيد و متنساش تنزل تتابعني على المدونات و تشوف كل اللي نزلته و اللي فات سلام .

قناة  ثقافة ذهن  :

https://www.youtube.com/channel/UCoc2wBFZTRs-2EEK2zCuc-A

 

قناة  ثقافة ذهن Shorts :

https://www.youtube.com/channel/UCsL0JmOu43JNZyGl89RoADQ

 

قناة Mahmoud Walaa 1 :

https://www.youtube.com/channel/UCZkRwjBTW5hnbVXo7IurIwQ

 

مدونة ثقافة ذهن  :

https://th8afat-zhn2.blogspot.com/

 

مدونة علم الفلك – ثقافة ذهن :

https://th8afat-zhn.blogspot.com/

 

TikTok th8afat_zhn :

https://www.tiktok.com/@th8afat_zhn

 

TikTok th8afat_zhn_shorts :

https://www.tiktok.com/@th8afat_zhn_shorts

 

TikTok Mahmoud_Walaa_1 :

https://www.tiktok.com/@mahmoud_walaa_1

 

مدونة عالم الحيوان –  ثقافة ذهن :

https://th8afat-zhn1.blogspot.com/